មន្ទីរពេទ្យ សម្តេចតេជោ ស្រអែម ធ្វើការប្រលងទ្រឹស្ដីនិងអនុវត្ត
កាលពីព្រឹកថ្ងៃទី ១០ ខែសីហា ឆ្នាំ ២០១៥ សិក្ខាកាម ៦២ នាក់ មកពីភូមិភាគ ៤ នៃទិសព្រះវិហារ បានចូលរួមប្រលងផ្នែកទ្រឹស្ដីនិងការអនុវត្តជាក់ស្ដែង មន្ទីរពេទ្យ សម្តេចតេជោ ស្រអែម ក្រោយពីបានចាប់ផ្ដើមរៀនសូត្រតាំងពីខែមិថុនា ឆ្នាំ ២០១៤ មក។ សិក្ខាកាមទាំងនេះ សុទ្ធតែត្រូវបានជ្រើសរើសទៅតាមអាទិភាពនៃតំបន់ឬមូលដ្ឋានដែលខ្លួនរស់នៅ។
សិក្ខាកាមដែលប្រលងបញ្ចប់វគ្គសិក្សានេះ នឹងចូលរួមពង្រឹងនិងពង្រីកសមត្ថភាពឆ្លើយតបខាងផ្នែកសុខាភិបាលជូនកងយោធពលខេមរភូមិន្ទ និងប្រជាពលរដ្ឋក្នុងមូលដ្ឋាន។
គួរកត់សម្គាល់ថា មន្ទីរពេទ្យ សម្តេចតេជោ ស្រអែម ត្រូវបានអគ្គនាយកដ្ឋានភស្តុភារនិងហិរញ្ញវត្ថុ បង្កើតចេញពីគិលានដ្ឋានតូចមួយក្រោយពេលមានជម្លោះព្រំដែនជាមួយកងទ័ពថៃកាលពីមុនឆ្នាំ ២០១០ ហើយបានប្រែក្លាយមកជាមន្ទីរ ជាកន្លែងបណ្ដុះបណ្ដាល និងជាចំណុចដ៏សំខាន់មួយសម្រាប់ការងារសុខាភិបាលក្នុងភូមិភាគនេះ។
មន្ទីរពេទ្យ សម្តេចតេជោ ស្រអែម មានទីតាំងស្ថិតនៅភូមិស្រអែម ឃុំកន្ទួត ស្រុកជាំក្សាន្ត ខេត្តព្រះវិហារ និងត្រូវបានសម្ភោធជាផ្លូវការកាលពីដើមឆ្នាំ ២០១៤។
