នាយឧត្តមសេនីយស៊ុំ សំណាងបំពាក់មេដាយជូនវេជ្ជបណ្ឌិតនៃកងទ័ពរំដោះប្រជាជនចិន

កាលពីថ្ងៃទី ១៩ ខែ​មករា ឆ្នាំ ២០១៦ នាយឧត្តម​សេនីយ​ស៊ុំ សំណាង អគ្គនាយក​ភស្តុភារ- ហិរញ្ញវត្ថុ​នៃ​ក្រសួងការពារជាតិ​កម្ពុជា បាន​​បំពាក់​មេដាយសហមេត្រី ថ្នាក់​អស្សឫទ្ធិ និង​ផ្ដល់​ប័ណ្ណ​សរសើរ​ជូន​វេជ្ជបណ្ឌិតនៃកងទ័ព​រំដោះប្រជាជនចិនដែល​បាន​ចូលរួម​បណ្ដុះបណ្ដាល​ដល់​វេជ្ជបណ្ឌិត​និង​គ្រូពេទ្យ​នៃ​មន្ទីរ​ពេទ្យ​ព្រះកេតុមាលា។

ថ្មីៗនេះ​មន្ទីរពេទ្យ​ក៏បាន​ទទួល​សម្ភារៈជំនួយ​ពីប្រទេស​ចិន​​​រួម​មាន ម៉ាស៊ីន​ស្កេន​ថត​ឆ្លុះ​ខួរ​ក្បាល ឆ្អឹងខ្នង និង​សរសៃ​ប្រសាទ (MRI)  ០១ គ្រឿង  ម៉ាស៊ីនថត​ដោយ​ប្រើកាំ​រស្មី​អ៊ិច​ (CT Scan) ០១​ គ្រឿង  ម៉ាស៊ីន​ធ្វើ​រោគ​វិនិច្ឆ័យ​​បេះដូង (Cath-Lab) ០១ គ្រឿង ម៉ាស៊ីន​​ពិនិត្យ​សរសៃ​ឈាម​ក្នុង​ជាលិកា (DSA) ០១ គ្រឿង និងបរិក្ខាររួមផ្សំមួយចំនួនទៀត ដែល​សុទ្ធសឹង​ជា​ឧបករណ៍​ទំនើប។

ស្របនឹងការ​ផ្ដល់​ឧបករណ៍​ទំនើប កងទ័ពរំដោះប្រជាជន​ចិន​ក៏តែងបាន​បណ្ដុះ​បណ្ដាល​សមត្ថភាព​ដើម្បី​ឲ្យ​វេជ្ជបណ្ឌិត​នៃ​មន្ទីរ​ពេទ្យនេះ​មាន​សមត្ថភាព​ដើរទាន់​តាម​បច្ចេកវិទ្យា​ទំនើប។

នាយ​ឧត្តម​សេនីយ​ ស៊ុំ​ សំណាង​ បាន​ថ្លែង​អំណរ​គុណ​យ៉ាង​ជ្រាលជ្រៅ​ចំពោះ​ប្រជាជន​និង​រដ្ឋាភិបាល​ចិន ដែលបាន​ផ្ដល់ជំនួយ​មនុស្សធម៌​ដ៏មាន​តម្លៃ​នេះ​ដល់​ប្រទេស​កម្ពុជា។