កម្ពុជាបញ្ចប់សន្និសីទមេបញ្ជាការសុខាភិបាលយោធាអាស៊ានលើកទី៨
ថ្ងៃអង្គារ ៩រោច ខែពិសាខ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៨ ដល់ថ្ងៃទី១១ ខែឧសភា ឆ្នាំ២០១៨ ឧត្តមសេនីយឯក គង់ សាលី នាយក នាយកដ្ឋានសុខាភិបាល អមដំណើរដោយមន្រ្តីចំនួន៣រូប តំណាងនាយកដ្ឋានហិរញ្ញវត្ថុ ១រូប និងតំណាងនាយកដ្ឋានកិច្ចការអាស៊ាន ១រូប បានចូលរួមសន្និសីទមេបញ្ជាការសុខាភិបាលយោធាអាស៊ានលើកទី៨ នៅសាធារណៈរដ្ឋសឹង្ហបុរី ក្នុងគោលបំណងរឹតចំណងសាមគ្គីភាពរវាងវិស័យសុខាភិបាលយោធានៃបណ្តាប្រទេសអាស៊ាន ក៏ដូចជាការអភិវឌ្ឍន៍ចំណេះដឹងថ្មីៗអំពីការគ្រប់គ្រង ការព្យាបាលជំងឺ ការទប់ស្កាត់នៃការរីករាលដាលនៃជំងឺឆ្លង និងគ្រោះមហន្តរាយធម្មជាតិផ្សេងៗ។
ប្រតិភូមកពី ១០ ប្រទេស ដែលចូលរួមក្នុងសន្និសីទមកពី ម៉ាឡេស៊ី ថៃ សិង្ហបុរី ហ្វីលីពីន ប្រ៊ុយណេ វៀតណាម មីយ៉ាន់ម៉ា ឡាវ កម្ពុជា និងឥណ្ឌូនេស៊ី។
សន្និសីទមេបញ្ជាការសុខាភិបាលយោធាអាស៊ាន គឺជាការប្រជុំប្រចាំឆ្នាំដែលរៀបចំ និងធ្វើជាម្ចាស់ផ្ទះដោយការប្ដូរវេនគ្នាក្នុងចំណោមប្រទេសក្នុងតំបន់អាស៊ាន។ ការប្រជុំជាលើកដំបូងបានធ្វើឡើងនៅទីក្រុងហាណូយ ប្រទេសវៀតណាម។
វាជាឱកាសដើម្បីមន្ត្រីយោធាបានចែករំលែកព័ត៌មាន បទពិសោធន៍ ការអនុវត្តជាក់ស្ដែង ការសិក្សាផ្នែកវេជ្ជសាស្រ្ត និងការស្រាវជ្រាវនានាដែលមានឥទ្ធិលពលមកលើជីវភាពរស់នៅ និងសុខភាពរបស់ប្រជាជននៅក្នុងតំបន់។
នៅឆ្នាំ ២០១៩ វាជាវេនរបស់កម្ពុជាដើម្បីធ្វើម្ចាស់ផ្ទះវិញម្ដង។
