កងពលតូចដឹកជញ្ជូនលេខ៩៩ ត្រៀមចូលរួមឆ្លើយតបនឹងបាតុភូតអ៊ែល នីនូ
ព្រឹកថ្ងៃចន្ទ ៧កើត ខែបុស្ស សំរឹទ្ធិស័ក ព.ស ២៥៦២ ត្រូវនឹងថ្ងៃទី១១ ខែកុម្ភៈ ឆ្នាំ២០១៩៖ ក្រោយពីបានទទួលបទបញ្ជាពីនាយឧត្តមសេនីយ៍ ស៊ុំ សំណាង អគ្គនាយកនៃ អគ្គនាយកដ្ឋានភស្តុភារ-ហិរញ្ញវត្ថុ កងពលតូចដឹកជញ្ជូនលេខ៩៩ បានរៀបចំត្រៀមលក្ខណៈ ឧបករណ៍ មធ្យោបាយ បូម និង ដឹកជញ្ជូនទឹកដើម្បីចុះជួយប្រជាពលរដ្ឋដែលក្នុងភូមិសាស្ត្រខ្លះៗដែលអាចនឹងជួបគ្រោះរាំងស្ងួត ខ្វះទឹកប្រើប្រាស់ក្នុងពេលខាងមុខនេះ។
ថ្មីៗនេះ ក្រសួងធនធានទឹក និងឧតុនិយមបានធ្វើការព្យាករណ៍ថា ព្រះរាជាណាចក្រកម្ពុជា អាចនឹងជួបអាកាសធាតុក្តៅខុសពីធម្មតា ដោយសាររងឥទ្ធិពលបាតុភូតអ៊ែល នីនូ។ បាតុភូតនេះនឹងធ្វើឲ្យក្ដៅខ្លាំង ជាពិសេសខែមេសា និងឧសភា ឆ្នាំ ២០១៩ ខាងមុខនេះ។
ជាវិធានការត្រៀមឆ្លើយតប កងពលតូចបានត្រួតពិនិត្យឡើងវិញនូវសម្ភារបូមទឹក ម៉ាស៊ីន ទុយយោ រថយន្ត ប្រេងឥន្ធនៈ ព្រមទាំងក្រុមការងារសង្រ្គោះ ក្នុងករណីបាតុភូតនេះកើតមានមែន។
ទោះយ៉ាងណា ការត្រៀមបម្រុងនេះ ក៏ធ្លាប់បានធ្វើកន្លងមក និងតែងបានចុះអន្តរាគមន៍តាមសេចក្ដីត្រូវការជាក់ស្ដែងកន្លងមកដែរ។
