នាយឧត្តមសេនីយស៊ុំ សំណាង អញ្ជើញបញ្ចុះបឋមសិលាអគារព្យាបាលភ្នែកនិងឆ្អឹង
កាលពីព្រឹកថ្ងៃទី ៣ ខែកញ្ញា ឆ្នាំ ២០១៥ នេះ នាយឧត្តមសេនីយស៊ុំ សំណាង អគ្គនាយកភស្តុភារនិងហិរញ្ញវត្ថុ ក្រសួងការពារជាតិកម្ពុជា បានអញ្ជើញបញ្ចុះបឋមសិលាសាងសង់អគារព្យាបាលភ្នែកនិងឆ្អឹងនៅមន្ទីរពេទ្យព្រះកេតុមាលា ក្រោមជំនួយរបស់ក្រសួងការពារជាតិវៀតណាម។
វរសេនីយឯក ង្វៀន អាញ់យុង ប្រធានអានុព័ន្ធយោធាវៀតណាម បានមានប្រសាសន៍ថា អគារដែលមានទឹកប្រាក់ជាង ១ លានដុល្លារ បណ្ដោយ ៤៣ ម៉ែត្រ ទទឹង ១៥ ម៉ែត្រ កម្ពស់ ៥ ជាន់ នេះ គឺជាសក្ខីភាពនៃការសាមគ្គីស្មាកៀកស្មារបស់កងទ័ពទាំងពីរ ដែលធ្លាប់ប្រយុទ្ធរួមគ្នា ហើយបច្ចុប្បន្នកំពុងសហប្រតិបត្តិការ និងអភិវឌ្ឍន៍ជាប់ជាបន្តបន្ទាប់ថែមទៀត។
ឧត្តមសេនីយឯក លី សុវណ្ណ ប្រធានមន្ទីរពេទ្យព្រះកេតុមាលាថ្លែងថា តាំងពី ២០០៧ មក សម្ព័ន្ធមេត្រីភាពរវាងមន្ទីរពេទ្យយោធា ១៧៥ ក្រុងហូជីមិញ និងមន្ទីរពេទ្យព្រះកេតុមាលា បានផ្ដល់ឱកាសឲ្យវេជ្ជបណ្ឌិត ៣២ រូបចូលរួមសិក្សាជំនាញសំខាន់ៗ។ ទន្ទឹមនេះ ក្រុមគ្រូពេទ្យនៃមន្ទីរពេទ្យទាំងពីរបានធ្វើសកម្មភាពមនុស្សធម៌ វះកាត់ភ្នែកឡើងបាយ បាន ២៧០០ លើកនាក់ និងព្យាបាលភ្នែកជាង ៤០០០ លើកនាក់ផងដែរ។
ក្នុងប្រសាសន៍ថ្លែងអំណរគុណដល់ក្រសួងការពារជាតិវៀតណាម នាយឧត្តមសេនីយ ស៊ុំ សំណាង បានលើកឡើងថា នេះជាការឆ្លើយតបនឹងតម្រូវការចាំបាច់របស់កម្ពុជា ជាពិសេសគឺជំនាញភ្នែកនិងឆ្អឹងនេះ ហើយជាការតបស្នងនឹងសណ្ដានចិត្តដ៏ថ្ងៃថ្លានេះ នាយឧត្តមសេនីយបានលើកទឹកចិត្តឲ្យមានការថែទាំសមិទ្ធផលនានាដែលជាជំនួយឥតសំណង និងត្រូវប្ដេជ្ញាថែរក្សាឲ្យបានគង់វង្សជារៀងរហូតនូវចំណងសាមគ្គីភាព ជាពិសេសចំណងមេត្រីភាពជាមួយមន្ទីរយោធា ១៧៥ ក្រុងហូជីមិញ ដែលកំពុងពង្រឹងស្តង់ដារសមត្ថភាពដ៏ខ្ពង់ខ្ពស់មួយ។
ជាចុងក្រោយ ឯកឧត្តមបានលើកទឹកចិត្តថា យើងក៏ត្រូវប្រែក្លាយមន្ទីរពេទ្យព្រះកេតុមាលា ឲ្យទៅជាមន្ទីរពេទ្យដែលទទួលបានសេចក្ដីទុកចិត្តពីយោធិននិងប្រជាពលរដ្ឋកម្ពុជាផងដែរ។