នាយឧត្តមសេនីយ ស៊ុំ សំណាង បញ្ចុះបឋមសិលារោងជាងជួសជុលរថយន្ត
កាលពីព្រឹកថ្ងៃទី ០១ ខែកក្កដា ឆ្នាំ ២០១៥ នេះ នៅទីបញ្ជាការកងពលតូចដឹកជញ្ជូនលេខ ៩៩ មានបើកពិធីបញ្ចុះបឋមសិលាកសាងរោងជាងជួសជុលរថយន្តដែលជាជំនួយរបស់កងទ័ពរំដោះប្រជាជនចិន ក្រោមអធិបតីភាពឯកឧត្តម នាយឧត្តមសេនីយ៍ ស៊ុំ សំណាង អគ្គនាយកភស្តុភារ ហិរញ្ញវត្ថុ ក្រសួងការពារជាតិ និង លោក វរសេនីយទោ Ly Ning Ya អនុពន្ធយោធាចិន ប្រចាំព្រះរាជាណាចក្រកម្ពុជា។
នេះមិនមែនជាលើកទីមួយទេដែលប្រទេសចិនបានជួយឧបត្ថម្ភដល់ ខ.ភ.ម។ កន្លងមក កងទ័ពប្រជាជនចិន បានផ្ដល់រថយន្តយោធាជាច្រើនគ្រឿង។ រហូតមកដល់ពេលនេះ រថយន្តទាំងនោះបានចូលរួមចំណែកយ៉ាងសកម្មក្នុងការដឹកជញ្ជូនបម្រើកងទ័ព ក៏ដូចជាការងារស៊ីវិល ការសង្រ្គោះក្នុងគ្រោះមហន្តរាយ ការដឹកយុវជនស្ម័គ្រចិត្តវាស់ដីធ្លីជូនប្រជាពលរដ្ឋ ការដឹកពលករចំណាកស្រុកវិលពីប្រទេសថៃ និងការងារជាច្រើនទៀតក្នុងបុព្វហេតុការពារជាតិ។
រោងជាងនេះ នឹងឆ្លើយតបទៅនឹងតម្រូវការផ្នែកជួសជុលរថយន្តឲ្យមានប្រសិទ្ធភាពខ្ពស់។ នាយឧត្តមសេនីយ៍ ស៊ុំ សំណាង តាមរយៈលោកវរសេនីយទោ Ly Ning Ya បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនចិនដែលតែងតែមានចិត្តជួយដល់ប្រជាជនកម្ពុជា ជួយឧបត្ថម្ភគាំទ្រគ្រប់វិស័យ ជាពិសេសវិស័យការពារជាតិឲ្យមានសុខសន្តិភាព និងក្នុងកិច្ចការពារជាតិមាតុភូមិកម្ពុជា។
