គ្រូពេទ្យក្រុមទី១៤ នៃកងទ័ពរំដោះប្រជាជនចិនបានមកដល់មន្ទីរពេទ្យព្រះកេតុមាលា
ព្រឹកថ្ងៃ ៧រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែមករា ឆ្នាំ២០១៩ ឯកឧត្តម ពេជ្រ ឈឿន អគ្គនាយករង អគ្គនាយកដ្ឋានភស្តុភារ-ហិរញ្ញវត្ថុ បានអញ្ជើញចូលរួមក្នុងពិធីសំណេះសំណាលជូនដំណើរ ក្រុមគ្រូពេទ្យ ទី១៣ និង ស្វាគមន៍ ក្រុម ទី១៤ នៃកងទ័ពរំដោះប្រជាជនចិន ដែលនៅប្រចាំការជួយបង្ហាត់បង្រៀន ក្រុមគ្រូពេទ្យកម្ពុជា ក្នុងមន្ទីរពេទ្យយោធា ព្រះកេតុមាលានេះ ។ ក្នុងពិធីសំណេះសំណាល ឧត្តមសេនីយ៍ឯក ពេជ្រ ឈឿន បានថ្លែងអំណរគុណ និង កោតសរសើរដល់ លោកវេជ្ជបណ្ឌិតចិនទាំងអស់ដែលខិតខំអស់ពីកម្លាំងកាយចិត្ត បង្ហាត់បង្រៀនបច្ចេកទេសថ្មីៗដល់គ្រូពេទ្យកម្ពុជា។
ជាលទ្ធផល ការបង្ហាត់បង្រៀនបានធ្វើឲ្យមន្ទីរពេទ្យព្រះកេតុមាលា កាន់តែបង្កើនសមត្ថភាពក្នុងការសង្គ្រោះព្យាបាល ជូនកងទ័ព និងប្រជាពលរដ្ឋ រួមចំណេកកាត់បន្ថយការចេញទៅព្យាបាលនៅក្រៅប្រទេស ។
បច្ចុប្បន្ននេះ មន្ទីរពេទ្យមានសមត្ថភាព អាចព្យាបាល វះកាត់ជំងឺបេះដូង វះកាត់ឆ្អឹងខ្នង សរសៃប្រសាទ និងមានម៉ាស៊ីនស្កែនទំនើបៗ ដែលមួយផ្នែកជាអំណោយរបស់កងទ័ពរំដោះប្រជាជនចិន ។